The Canterbury Tales: The Knight's Tale
We stryven as dide the houndes for the boon,
They foughte al day, and yet hir part was noon.
Ther cam a kyte, whil they weren so wrothe,
And baar awey the boon bitwixe hem bothe.
And therfore at the kynges court, my brother,
Ech man for hymself, ther is noon oother.
But to th'effect, it happed on a day
To telle it yow as shortly as I may,
A worthy duc, that highte Perotheus,
That felawe was unto duc Theseus
Syn thilke day that they were chidren lite,
Was come to Atthenes his felawe to visite.
For in this world he loved no man so,
And he loved hym als tendrely agayn.
So wel they lovede, as olde bookes sayn,
That whan that oon was deed, soothly to telle,
His felawe wente and soughte hym doun in helle.