The Canterbury Tales: The Wife of Bath's Prologue
Of alle men yblessed moot he be,
The wise astrologien, Daun Ptholome,
That seith this proverbe in his Almageste:
'Of alle men his wysdomis the hyeste
that rekketh nevere who hath the world in honde.'
And yet, with sorwe, thou most enforce thee,
And seye thise wordes in the Apostles name,
'In habit, maad with chastitee and shame,
Ye wommen shul apparaille yow,' quod he,
'And noght in tressed heer and gay perree,
As perles, ne with gold, ne clothes riche.'
After thy text, ne after thy rubriche
I wol nat wirche, as muchel as a gnat!
He hadde a book that gladly, nyght and day,
For his desport he wolde rede always.
He cleped it Valerie and Theofraste,
At which book he lough alwey ful faste.
And eek ther was som tyme a clerk at Rome,
A cardinal that highte Seint Jerome,
that made a book agayn Jovinian,
In whiche book eek ther was Tertulan,
Crisippus, Trotula and Helowys,
That was abbesse nat fer fro Parys,
And eek the Parables of Salomon,
Ovides Art, and bookes many on.