The Canterbury Tales: The Wife of Bath's Prologue
'Experience, though noon auctoritee
Were in this world, is right y-nough for me
To speke of wo that is in mariage.
For lordinges, sith I twelf yeer was of age,
Thonked be God that is eterne on lyve,
Housbondes at chirche-dore I have had fyve.'
But me was told, certeyn, nat longe agon is,
That sith that Crist ne wente nevere but onis
To wedding in the Cane of Galilee,
That by the same ensample taughte he me
That I ne sholde wedded be but onis.
But that I axe, why that the fifthe man
Was noon housbond to the Samaritan?
How manye mighte she have in mariage?
Yet herde I never tellen in myn age
Upon this nombre diffinicioun.