* Site-Outage Notice: Our engineering elves will be tweaking the Shmoop site from Monday, December 22 10:00 PM PST to Tuesday, December 23 5:00 AM PST. The site will be unavailable during this time.
Dismiss
© 2014 Shmoop University, Inc. All rights reserved.
To a Mouse

To a Mouse

by Robert Burns

To a Mouse: Text of the Poem

On Turning up in Her Nest with the Plough, November, 1785

Wee, sleeket, cowran, tim'rous beastie,
O, what a panic's in thy breastie!
Thou need na start awa sae hasty,
  Wi' bickerin brattle!
I wad be laith to rin an' chase thee
  Wi' murd'ring pattle!

I'm truly sorry Man's dominion
Has broken Nature's social union,
An' justifies that ill opinion,
  Which makes thee startle,
At me, thy poor, earth-born companion,
  An' fellow-mortal!

I doubt na, whyles, but thou may thieve;
What then? poor beastie, thou maun live!
A daimen-icker in a thrave
  'S a sma' request:
I'll get a blessin wi' the lave,
  An' never miss 't!

Thy wee-bit housie, too, in ruin!
It's silly wa's the win's are strewin!
An' naething, now, to big a new ane,
  O' foggage green!
An' bleak December's winds ensuin,
  Baith snell an' keen!

Thou saw the fields laid bare an' waste,
An' weary Winter comin fast,
An' cozie here, beneath the blast,
  Thou thought to dwell,
Till crash! the cruel coulter past
  Out thro' thy cell.

That wee-bit heap o' leaves an' stibble
Has cost thee monie a weary nibble!
Now thou's turn'd out, for a' thy trouble,
  But house or hald,
To thole the Winter's sleety dribble,
  An' cranreuch cauld!

But Mousie, thou art no thy-lane,
In proving foresight may be vain:
The best laid schemes o' Mice an' Men
  Gang aft agley,
An' lea'e us nought but grief an' pain,
  For promis'd joy!

Still, thou art blest, compar'd wi' me!
The present only toucheth thee:
But Och! I backward cast my e'e,
  On prospects drear!
An' forward tho' I canna see,
  I guess an' fear!

People who Shmooped this also Shmooped...

Advertisement
Noodle's College Search
Advertisement
Advertisement
Advertisement